Երևանի Շոկոլադի գործարան

«Երևանի Շոկոլադի Գործարան»-ի պատմությունն սկսվեց 2006 թվականին, երբ այն դեռ կոչվում էր «Սոնագրո» և հայկական շուկա մուտք գործեց իր առաջին ապրանքանիշերով՝ հայ սպառողին ներկայանալով կոնֆետների և ալրային հրուշակեղենի տեսականիով: Հաջող մուտքը շուկա ընկերության համար խթան հանդիսացավ կտրուկ բարելավելու թողարկվող արտադրանքի տեսականին ու որակը, ինչպես նաև ընդլայնել ապրանքի իրացման շուկաները:
Ըստ էության, 2015թ.դրվեց ընկերության նոր պատմության սկիզբը: Մասնագիտանալով շոկոլադի արտադրության մեջ և գիտակցելով իր դերը հայկական շոկոլադի միջազգային ճանաչման գործում՝ նախկին Սոնագրո ընկերությունը վերանվանվեց Երևանի Շոկոլադի Գործարան՝ դառնալով Հայաստանի այցեքարտերից մեկը միջազգային հարթակում: Ընկերությունն այսօր շուկային ներկայանում է «Mark Sevouni» «Sonuar» և «PapiHDAN» բրենդերով:
Սպառողին որակյալ շոկոլադե արտադրանքով ներկայանալու հրամայականից ելնելով՝ ընկերությունը համագործակցում է հումք արտադրող բելգիական, գերմանական, շվեդական, իտալական, հոլանդական և ռուսական մի շարք առաջատար կազմակերպությունների հետ: Երևանի շոկոլադի գործարանը շարունակական քայլեր է ձեռնարկում ոչ միայն տեղական, այլ նաև արտասահմանյան շուկայում իր դիրքերն ամրապնդելու համար: Ներկայումս ընկերության արտադրանքը սպառվում է Հայաստանում, ԱՄՆ-ում, Բելառուսում, Վրաստանում, Ռուսաստանում և ԵԱՏՄ ու ԱՊՀ այլ երկրներում, իսկ առաջիկայում նախատեսվում է հայկական շոկոլադի արտահանում Արաբական երկրներ: